Casino Asunción

Ekkert getur mögulega verið jólalegra en að eyða jóladagskvöldi í spilavíti.  Öll ljósin og músíkin minna margt á jólin, rauð teppi á gólfum og starfsfólk er jakkafataklætt.  Fólk í hátíðarskapi og allir að græða, eða svona u.þ.b.

Fjölskyldan ákvað að kíkja í spilavíti Asunción borgar á jóladagskvöld.  Aldrei hef ég komið inn í spilavíti svo það hljómaði sem spennandi jólaafþreying.  Ég fór í mitt fínasta púss, þ.e.a.s. bretti niður buxurnar, strauaði götóttu skyrtuna sem ég keypti á útimarkaði í Buenos Aires og setti bláa teyju í hárið.  Þegar inn var komið þá voru fleiri þarna en ég þorði að ýminda mér, ótrúlegur fjöldi af fólki sem telur það góða jólaafþreyingu að fara í spilavíti.  Gamlar konur með klink í bauk fyrir framan spilakassa, töff náungar með vindla fyrir framan pókerborðin og heitar skvísur gefandi spilin.  Alveg eins og í Vegas.

Ég keypti mér spilapeninga fyrir 25.000 Guaranis, gjaldmiðils Paragvæ, og skemmti mér konunglega við að tapa þeim öllum.  Sárt var að tapa en ég lágmarkaði þó skaðann með því að úða í mig ókeypis súkkulaðimolum sem lágu í skál á barborðinu.

Þetta var fínasta kvöldskemmtun og ljómandi jólaafþreying en þó ekki eitthvað sem ég sé sjálfan mig stunda af krafti í framtíðini.

25.000 guaranis jafngilda 630 íslenskum krónum.