Tucumán

Skrifað upphaflega 23/11 með penna í dagbók.

Er kominn til Tucumán eftir stutt stopp í Cordoba.  Tucumán er í suðurhluta norðurhluta Argentínu og er minnsta sýsla landsins.

——–

Ég er á gangi i miðbænum, nýmættur a svæðið, með bakpokann á bakinu, með úfið hár, skítugur og eflaust illa lyktandi, þegar maður nálgast mig.  Hann var á sextugsaldri, i stuttermaskyrtu og hélt a skjalatösku.

-,,Hey þú, þekkiru son minn, Hugo Valdes, hann er svona hippi eins og þú”
-,,Nújá? Komdu sæll. Nei, það held ég ekki”
-,,Hann heldur alltaf til á Plaza Dorrego í San Telmo i Buenos Aires. Þekkiru þann stað?”
-,,Ja… ég bý nú í San Telmo, örfáum metrum frá…”
-,,Já flott, þú ættir þá að leita að honum þegar þú kemur til Buenos Aires. Hann er með mikið hár eins og þú, selur handverk”
-,,Ég kannski geri það, takk”
-,,Biður þú ekki bænirnar þínar á kvöldin? Trúir þú ekki á guð?” Segir hann og dregur upp úr vasa sínum hálsmen með Maríu Mey á og kyssir.
-,,Nee, get varla sagt það”
-,,Nú, þá verður þú að byrja a því, annað er ekki hægt. Vertu blessaður”

Áður en ég náði að kveðja undarlega manninn þá var hann rokinn i burtu.  Nóg að gera.

——–

Fékk inni hjá Joaquim sem er einn af þeim fjölmörgu sem skráðir eru á síður eins og HospitalityClub.org og CouchSurfing.com.  Það var notalegt að komast i heita sturtu og sofa á alvöru dýnu einu sinni eftir tveggja vikna tjaldvolk.

Er nú á leið enn lengra i nordur.  Stefni á að fara á puttanum gegnum Catamarca, Salta og Jujuy og komast inn í Bólivíu einhverntíman fyrstu vikuna í desember.

Í Bólivíu er verðlag afar hagstætt og er það líklegast eitt af fáum löndum í heiminum í dag þar sem hægt er að gera sér glaðan dag með íslenskum krónum.